Presidenti i zgjedhur Joe Biden ka zgjedhur këshilltarin e tij të vjetër Ron Klain për të shërbyer përsëri në rolin e shefit të stafit të tij, duke vendosur një ndihmës me përvojë prej disa dekadash në rolin kryesor në stafin e presidentit.

Klain do të drejtojë një Shtëpi të Bardhë që ka të ngjarë të jetë e përqendruar tek përgjigja ndaj pandemisë së koronavirusit, e cila vazhdon të përhapet pa kontroll në të gjithë vendin. Ai do të përballet gjithashtu me sfidën për të punuar me një Kongres të ndarë që mund të përfshijë një Senat të udhëhequr nga republikanët. Klain shërbeu si koordinator për përgjigjen ndaj Ebolës gjatë shpërthimit të virusit në vitin 2014.

Në një deklaratë të mërkurën në mbrëmje, Biden u shpreh se ai zgjodhi Klain për këtë post sepse përvoja e tij e gjatë në Uashington e kishte përgatitur atë për sfida të tilla.

“Përvoja e tij e thellë dhe e larmishme dhe aftësia për të punuar me njerëz të të gjithë spektrit politik është pikërisht ajo që më duhet në një shef të stafit të Shtëpisë së Bardhë ndërsa përballemi me këtë moment krize dhe bashkojmë vendin“, tha zoti Biden.

Klain shërbeu si shef i stafit të Biden gjatë mandatit të parë të presidentit Barack Obama, ishte shef i stafit të nënpresidentit Al Gore në mes të viteve 1990 dhe ishte një nga këshilltarët kryesorë në fushatën e Biden, duke udhëhequr përgatitjet e debatit të tij dhe përgjigjen ndaj koronavirusit. Ai është njohur dhe ka punuar me zotin Biden që nga fushata presidenciale e demokratëve në vitin 1987.

Zgjedhja e Klain nënvizon përpjekjen që administrata e ardhshme Biden do të bëjë në përgjigjen e saj ndaj koronavirusit qysh ditën e parë. Klain ka përvojë në shëndetin publik si koordinator i përgjigjes për Ebolën dhe luajti një rol kryesor në hartimin dhe zbatimin e planit të rimëkëmbjes ekonomike të administratës Obama në vitin 2009.

Trump nuk njeh humbjen

Ndërkohë, Donald Trump ende nuk e njeh humbjen në zgjedhjet e SHBA dhe në postimet e tij në Twitter shkruan: “Ne do të fitojmë”.

Departamenti i Shtetit i SHBA nuk po lejon Joe Biden të ketë qasje në mesazhet nga udhëheqësit e huaj që kanë arritur në ministri. CNN raporton atë duke cituar disa burime, sipas të cilave Departamenti i Shtetit tradicionalisht lehtëson komunikimet me presidentin e zgjedhur. Por fakti që Presidenti i tanishëm Donald Trump nuk e ka pranuar ende fitoren e Biden do të thotë që mesazhet nuk janë marrë nga presidenti i zgjedhur.