Pandemia ka goditur tashmë tregtinë botërore, dhe efektet e saj në ekonomi po ndihen gjithandej.

Në Shqipërinë Lindore, minatorët e kromit përpiqen dita ditës të sigurojnë jetesën sepse për shkak të rënies së eksporteve me Kinën, tregu po tkurret në mënyrë drastike.

“Kur Kina ka probleme, Bulqiza është i vetmi vend në Shqipëri që vuan goditjen e parë direkte për shkak të mungesës së kërkesës për krom,” – u shpreh menaxheri logjistik, Henri Kurti.

Në rajonin malor ku ndodhen dhe minierat e kromit, në një nga zonat më të varfra të Shqipërisë, jetesa e mijëra banorëve është në rrezik.

Shqetësimin për situatën që ka krijuar pandemia e shprehu dhe një minator.

“Pandemia ka ndikuar shumë sepse nuk ka treg kromi. Po u mbyll miniera s’kemi si të mbajmë familjen,” – tha Florent Veseli.

Minatorët duhet të futen 1000 metra në nëntokë, për vetëm 300 euro në muaj dhe gjithmonë me frikën se nga momenti në moment mund të mbeten të papunë.

Një punonjëse jashtë minierave tregoi frikën që ndjen për familjarët e saj që punojnë në nëntokë.

“Burri dhe djali im po ashtu punojnë në minierë dhe gjithmonë i lutemi zotit që ata të dalin të gjallë dhe të sigurt, puna është e rrezikshme, shumë e rrezikshme,” – tha Manushaqe Dani.

Për momentin, pothuajse një e treta e 2,660 minatorëve janë të papunë.

Vetëm 20 nga 130 ndërmarrje vazhdojnë punën në miniera, sepse rënia e çmimeve nuk mbulon kostot e prodhimit.

Drita jashtë tunelit ende nuk mund të shihet.