Viti 2020 nuk ishte një vit si gjithë të tjerët për Ronaldinjon, i cili ka kaluar 171 ditë mes burgut dhe arrestit të shtëpisë në Paraguai, por tani ish-kampioni brazilian mund të buzëqeshë. Imazhi i ish “Topit të Artë” duket se nuk është dëmtuar aq shumë dhe pas daljes nga burgu në gusht ai është impenjuar në aktivitete të ndryshme, që i kanë mbushur llogarinë bankare.
“El Pais” ka bërë një llogari, sipas së cilës Ronaldinjo ka fituar 5 milionë reales braziliane, që do të thotë rreth 780 mijë euro. Dinjo u ndalua në Paraguai bashkë me vëllanë me akuzën e falsifikimit të pasaportave. Ndeshjet e tij në burg me të dënuarit e tjerë u bënë menjëherë virale. Pastaj iu desh të pagunte rreth 160 mijë euro për të mbyllur çështjen dhe për t’iu kthyer jetës normale.
Dhe në fakt ai po përjeton një moment fantastik. Në shtator ishte në Belo Horizonte, pasi u kërkua nga një kompani e Minas Gerais për të promuvuar punët e kryera në stadiumin e Atletiko Mineiros, me të cilin braziliani ka fituar Kupën Libertadores në 2013-ën. Më pas u bë qytetar nderi dhe hapi edhe një studio muzikore. Videoja e realizuar me grupin “Recayd Mob” në projektin “Tropa do Bruxo”, ku Dinjo shfaqet i rrethuar nga femrat, ka kaluar 1 milion shikime në “YouTube” në më pak se një javë.
Ish-futbollisti ka krijuar edhe markën e tij të xhinit biologjik, që mban emrin “R-ONE”, si dhe verën e tij “Vino de Campeones”. Edhe bota e futbollit, edhe pse virtualisht, ka luajtur rolin e vet. Ish-lojtari i Barcelonës ka bërë një bashkëpunim me Pes dhe FIFA-n, duke krijuar skuadrën e tij, R10. Nuk mbaron me kaq, sepse ndër projektet e së ardhmes është edhe një film për jetën e tij.