Shqiptari që ka në dorë qeverinë e re në Mal të Zi: Njohja e Kosovës është çështje e mbyllur

Qeveria e re e Malit të Zi është në dorë të një shqiptari. Dritan Abazoviç, lideri i koalicionit Bardh e Zi, njëri prej tre koalicioneve opozitare që së bashku kanë marrë shumicën e votave pas zgjedhjeve të së dielës, është faktori kyç i të ardhmes së qeverisjes së Malit të Zi.

Me katër deputetë, koalicioni i tij përcakton formimin e qeverisë së re. Megjithatë, ai thotë se kushti kryesor për këtë është një qeveri ekspertësh, “që ne të përfaqësohemi nga njerëz profesionistë, dinjitozë”.

“Regjimi do të bëjë gjithçka, mafia do të bëjë gjithçka që kjo të mos ndodhë. Ata do të përpiqen në çdo mënyrë të shkaktojnë incidente. Detyrimi ynë është të tregojmë mençuri, përgjegjësi”, thotë ai.

Abazoviç ka folur për gazetën serbe “Kurir”. Gjatë intervistës, ai hedh poshtë mundësinë e një bashkëpunimi me PSD e Milo Gjukanoviçit.

“Platforma jonë është e qartë që nga fillimi, njerëzit që duan ndryshim votuan për ne, ndryshimet kanë ndodhur dhe ne nuk do ta lëshojmë këtë. Pavarësisht nga qindra telefonata, pavarësisht nga mijëra mesazhe që kam marrë në periudhën e mëparshme. Pavarësisht thirrjeve nga bashkësia ndërkombëtare, thirrjeve të kolegëve të mi nga rajoni, unë jap fjalën time që Dritan Abazović dhe koalicioni Bardh e Zi nuk do t’i nënshtrohen asnjë presioni”.

Intervista

Një mik, i cili jeton këtu në Mal të Zi dhe që e deklaron veten serb dhe është me gjithë zemër me opozitën, më tha diçka të ngjashme – Dritani është i fundit që tradhton! Keni frikë nga tradhtia në radhët e opozitës?

Nuk e di për çfarë lloj tradhtie është fjala. Dritani kurrë nuk ka tradhtuar asgjë dhe askënd. Të vetmit që mund të tradhtojnë janë ata që kanë tradhtuar më parë, dhe më duket, nga të gjitha opsionet, janë njerëz nën presion. Tek ne, presionet nuk kalojnë, ne e dimë shumë qartë se çfarë duam.

Katër ose pesë vjet më parë, Milo Gjukanoviç ju tha në një diskutim se keni qenë një bandit. Çfarë i thua Gjukanoviçit sot?

Asgjë! Secili ka moralin e tij dhe mënyrën e tij të komunikimit me kolegët dhe deputetët. Unë mendoj se është një çështje e edukimit. Unë mendoj se ai tregoi nervozizëm në atë rast dhe se ky ishte fillimi i fundit të tij.

A ju ftoi ai t’ju përgëzojë për fitoren e zgjedhjeve?

Jo, absolutisht jo. Unë nuk kam asnjë komunikim me të.

Si ndiheni kur ju quajnë “çetnik shqiptar”?

Ndihem gjithmonë mirë, si kur më vlerësojnë, ashtu edhe kur më sulmojnë. “Çetniku Shqiptar” është bërë sinonim i luftës kundër krimit të organizuar dhe korrupsionit dhe më vjen mirë që shumë njerëz që janë malazezë dhe serbë nga kombësia, tani kanë filluar të thonë: “Unë jam një çetnik shqiptar.” Nëse çetniku shqiptar është sinonim i ndryshimit, le të mbetet pjesë e kësaj fushate.

Sa i vështirë do të jetë formimi i një qeverie të re?

Do të jetë e vështirë. Do të jetë sfiduese sepse ndryshimet po ndodhin për herë të parë. Sigurisht, do të jetë një rrugë me pengesa, por kjo është gjithçka. Nuk do të doja që qytetarët të kishin pritshmëri se do të ndodhë brenda natës dhe se do të ndodhë menjëherë. Vendimet e duhura duhet të merren, koha kërkon mençuri, qeveria do të përpiqet të sabotojë gjithçka …

Ata kanë një përvojë të pasur në këtë pikë …

Po ashtu është. Ndoshta duke shkaktuar një incident, ndoshta me detyrim fizik, gjithçka duhet të llogaritet. Jam i sigurt që në fund të fundit do të kemi sukses dhe do t’i bëjmë të lumtur qytetarët.

Akademiku Matija Bećkoviç tha se nëse shqiptari Dritan Abazoviç, do të vinte në Beograd tani, të rinjtë serbë do ta mbanin atë në krahë. Çfarë u thua këtyre fjalëve, a do të vish në Beograd?

Unë nuk jam adhurues i Matija Beçkoviqit dhe nuk jam adhurues i deklaratave të tij, veçanërisht nga e kaluara. Me kënaqësi do të vij në Beograd, ashtu siç jam shumë i lumtur të udhëtoj në të gjitha vendet e rajonit. Unë pres që të takoj njerëz, kemi nevojë për më shumë pajtim. Mendoj se jap një kontribut të madh për këtë. Unë po pres me padurim të vij në Beograd dhe çdo qytet tjetër në rajon.

Si t’i pajtojmë Malin e Zi dhe Serbinë?

Më së miri është të tregohet me shembuj personalë se njerëzit nuk po grinden, por që qeveria i ndan njerëzit për interesa personale. Nëse punojmë më shumë për integrimin, do ta kuptojmë lehtësisht njëri-tjetrin. Kur nuk ka propagandë të synuar mediatike kundër dikujt, kur ju shtrëngoni duart me njerëz që mendojnë ndryshe, qëllimi nuk është të luftoni për shqiptarët, serbët, malazezët, por për njerëzit. Marrëdhëniet midis Malit të Zi dhe Serbisë janë të tensionuara sepse ky ishte interesi i partisë që ka qenë në pushtet deri më tani. Unë jam i sigurt se një nga interesat më të rëndësishëm kombëtare të Malit të Zi është që të ketë një politikë më të mirë të mundshme të fqinjësisë.

Titujt në mediat e Beogradit sot ishin: “Shqiptari Dritan Abazoviç vendos për të ardhmen e Malit të Zi”! Si ndiheni në këtë rol?

Nëse e kam atë përgjegjësi që nuk e prisja, se do të vendos për të ardhmen e Malit të Zi, unë e pranoj sfidën. Kam jetuar për një ditë që të ndodhë ndryshimi.

Cila është ëndrra jote?

Mali i Zi në Bashkimin Evropian, për t’u pajtuar dhe për të pasur një standard jetese shumë më të lartë se tani. Jam i sigurt se kjo ëndërr mund të bëhet realitet nëse veprojmë me përgjegjësi në qeverinë e ardhshme të Malit të Zi.

Nëse çështja e tërheqjes së njohjes së Kosovës është në axhendën e qeverinë e ardhshme të Malit të Zi, si do të reagoni?

Sigurisht që ne do të jemi kundër, dhe unë mendoj se kjo çështje nuk do të jetë në rendin e ditës sepse është diçka që ne e kemi përfunduar, ne nuk duhet të kthehemi në të kaluarën. Unë madje pres që Beogradi dhe Prishtina të gjejnë një gjuhë dhe marrëveshje të përbashkët në të ardhmen e parashikueshme që do të qetësonte tensionet dhe mundësonte procesin e pajtimit. Paqja nuk ka çmim. Të gjithë këtu duan paqe, askush këtu nuk dëshiron luftë, por jeta, biznesi …

Si do të bëni ndryshimin nga ata që kanë qeverisur deri më tani?

Qëllimi është të jemi të ndryshëm në gjithçka. Të punojmë në interes të qytetarëve, të mos jemi arrogantë, të mos jemi shpërdorues, të mos i përkushtohemi interesit personal, të jemi më profesionalë, më efikasë. Të pajtojmë të gjitha bashkësitë fetare, të jemi të ndryshëm në gjithçka.