Nga Ilir Mborja
Midis kartolinash të shumta për t’u uruar miqve Vitin e Ri 2022, për Ju z. Albin Kurti dhe, nëpërmjet Jush, të gjithë shqiptarëve që janë kundër nismës për “Ballkanin e Hapur”, vendosa t’Ju dërgoj këtë që paraqet Babagjyshin e Vitit të Ri me syze optike. Shpjegimin, se përse zgjodha pikërisht këtë pamje, e keni në tekstin që përmban kjo kartolinë:
I nderuar Kryeministri i Kosovës, z. Albin Kurti!
Më lejoni t’Ju uroj Ju dhe, nëpërmjet Jush, të gjithë kosovarët: Gëzuar Vitin e Ri 2022!
Fillimisht po Ju shpjegoj se përzgjedhja ime e kësaj kartoline me pamjen që paraqet Babagjyshin e Vitit të Ri me syze optike, nuk ishte e krejt e rastësishme. Nga portreti i tij kuptohet se, për të parë atë që ka afër, atij nuk i duhen hiç syzet. Ato duket se i ka vetëm për të parë larg. Prandaj, për ne që na ka në prag të hundës, Babagjyshi i ka ulur syzet dhe na vështron ashtu çuditshëm. Ky për mua është një mesazh që kam dëshirë t’Jua përcjell edhe Juve dhe gjithë atyre shqiptarëve që janë kundër nismës për “Ballkanin e Hapur” që mund të krahasohet me atë të rrëfenjës së vjetër shqiptare, të cilën po Jua përcjell siç ma kanë rrëfyer:
“Diku, dikur, në një ditë prej ditëve të fundit të një viti që po ikte dhe në pragun e një tjetri që po vinte, një plak me pamjen e Babagjyshit të Vitit të Ri ndaloi në pragun e kasolles së një fshatari të varfër.
“Jam FATI juaj. A pranoni si dhuratë prej meje një shtëpi të re dhe të madhe që të ndjeheni mirë ju dhe fëmijët e tu? A pranoni një lopë, dhjetë dele, një pendë qe,…? Por duhet të kesh parasysh një gjë! Dyfishin e asaj që do të t’ju dhuroj ju, do t’ia dhuroj edhe komshiut tënd që keni këtu ngjitur.” – i tha FATI fshatarit të varfër dhe bëri me kokë nga sarajet e komshiut të kamur.
Fshatari i varfër u përtyp, se, duket nuk e përcillte dot pështymën që i ngeci në fyt kur bëri hesap, se, po të pranonte dhuratën e FATIT, sa shumë do të fitonte komshiu i tij i kamur… Pas pak çastesh arriti t’i thotë FATIT të tij këto fjalë: “I dashur FATI im! Mund të më lejoni sonte të mendohem dhe t’ju kthej përgjigje nesër?”
“Po” iu përgjigj FATI kërkesës së çuditshme të fshatarit të varfër dhe, kur i shkoi të nesërmen në prag të kasolles, dëgjoi nga goja e tij këto fjalë:
“FATI im! Kërkoj nga ju të më nxirrni njërin sy! Kaq dua.””
*
Rrëfenja këtu mbaron dhe nuk dihet se ç’u bë me njërin sy të fshatarit të varfër dhe dy sytë e komshiut të tij të kamur… Por me siguri, FATI i tij në atë çast ka pasur pamjen e habitur të Babagjyshit të Vitit të Ri, m’u si tek kjo kartolinë. Prandaj, i nderuar z. Kryeministër, që Babagjyshi i ardhshëm të mos habitet më me kërkesa, të cilat për nismën e Ballkanit të Hapur nisen nga llogaritë se sa shumë fitojnë komshinjtë, bashkë me urimin tim për Vitin e Ri 2022, Ju lutem Juve të pranoni edhe këshillën time modeste: Ju nuk duhet të silleni si fshatari i varfër i rrëfenjës, që, kur i shkeli FATI në prag ngatërroi pragmatizmin me pragun e kasolles së vet…
Ky tregimi i juaj me babadimrin dhe fshatarin e varfur nuk i perket realitetit me ballkanin e hapur dhe Shqiptaret jan larg asaj mendsie qe t’ju verbohet njeri sy qe fqinjit ti verbohen dyt realiteti është se liria e Kosoves është fituar me gjak dhe ështeë jo liri e plotë por gjysmake fqinji verior don qe permes balkanit te hapur te kthej ndikimin e tij se ekonomikisht është superior krahasim me Kosoven dhe Shqiprin dhe pa mekanizmat mbrojtes Kosova vershohet me mallra serbe dhe falimenton edhe ata prodhues te pakt dhe pa njohjen e pavarsis serbia serish okupon vartson ekonomin Kosovare po dhe ata Shqiptare kshuqe open balkans eshte kurth per Kosven por Kemi Albin Kurtin dhe per ket faleminderojm Zotin se ai kupton miqt por dhe armiqt