Disa ditë pasi i rrugë negocimit të vaksinave ruse dhe kineze, qeveria ka bërë një tjetër ndryshim ku lejon përdorimin e vaksinave që nuk janë të certifikuara nga agjencia amerikane dhe europiane e barnave.
Përmes një akti normativ të datës 12 mars, Këshilli i Ministrave ka miratuar disa ndryshime në aktin e mëparshëm, ku aprovohen edhe trupa të tjera certifikuese të vendeve që prodhojnë vaksinën anti covid-19 si dhe përdorimin e tyre në popullatë.
Përfshirja e trupave të tjerë certifikues, i hap rrugë edhe vaksinave të tjera, sikurse mund të jenë vaksina ruse dhe kineze. Ky ndryshim vjen pasi dy ministrave, të Shëndetësisë dhe Rindërtimit iu dha drita jeshile për të negociuar dhe për të siguruar vaksina nga vende, që i kanë prodhuar dhe certifikuar ato brenda territorit të tyre.
“Vaksinat anti-COVID 19 aprovohen për përdorim në popullatë bazuar në aprovimet e Food andDrugs Administration të Shteteve të Bashkuara të Amerikës (FDA), ose European Medicine Agency (EMA) të Bashkimit Evropian ose të trupave të tjera certifikuese të vendeve që prodhojnë vaksina anti-COVID 19”, shkruhet në aktin normativ të qeverisë.
Ky parashikim në aktin normativ, hap rrugën për të negociuar për marrjen e vaksinave ‘Sputnik V’ nga Rusia dhe vaksinave ‘Sinovac’ dhe ‘Sinofarm’ nga Kina.
Ky akt normativ, përbën një ndryshim në politikën e ndjekur nga qeveria shqiptare për sigurimin e vaksinave anti-COVID.
Më herët kryeministri Rama, por edhe ministrja Manastirliu kishin deklaruar disa herë se po punonin për të siguruar vetëm vaksina që janë të certifikuara nga FDA në SHBA dhe EMA në Europë.
Aktualisht, Shqipëria e ka nisur procesin e vaksinimit prej fillimit të janarit falë dozave që janë dhuruar, por pjesës tjetër që janë marrë falë kontratës me ‘Pfizer’.
Procesi deri më tani ka ecur me ritme jo shumë të shpejta, ndërkohë që ditën e nesërme pritet të vijnë 38 400 dozat e para të vaksinës ‘Astrazeneca’.
