Shtetet e Bashkuara dhe disa qeveri evropiane kanë kërkuar lirimin e politikanit të opozitës Alexei Navalny nga paraburgimi rus.
44-vjeçari Navalny u arrestua nga policia menjëherë pasi udhëtoi nga Gjermania dhe mbërriti në Moskë të dielën.
Aktivisti po kthehej në vend, pesë muaj pasi u helmua me agjent nervor, për të cilin ai fajësoi autoritetet ruse.
Qeveria e Presidentit Vladimir Putin mohon helmimin e Z. Navalny, por pohimet e politikanit të opozitës janë mbështetur nga raportet e gazetarëve hulumtues.
Duke reaguar ndaj arrestimit të tij, SHBA dhe BE bënë thirrje që Z. Navalny, një kritik i Presidentit Putin të lirohej.
Sekretari i Shtetit i SHBA, Mike Pompeo, tha se autoritetet ruse po përpiqeshin t’i mbyllnin gojën kritikëve të tyre. Ai bëri thirrje për “lirimin e menjëhershëm dhe të pakushtëzuar” të Z. Navalny.
Këshilltari i ardhshëm i sigurimit kombëtar të presidentit të zgjedhur Joe Biden shpërtheu me një ton të ngjashëm.
“Sulmet e Kremlinit ndaj Z. Navalny nuk janë thjesht një shkelje e të drejtave të njeriut, por një ofendim ndaj popullit rus që dëshiron të dëgjohet zëri i tyre,” tha Jake Sullivan.
Jo më pak i ashpër ishte dhe reagimi nga Bashkimi Evropian. Franca, Italia dhe presidenti i Këshillit Evropian, Charles Michel, kanë bërë apel për lirimin e Z. Navalny.
Në deklaratën e saj, qeveria e Mbretërisë së Bashkuar tha se ishte “thellësisht e shqetësuar” nga arrestimi i Z. Navalny, duke shtuar: “Në vend që të përndjekin viktimën e këtij krimi të tmerrshëm, autoritetet ruse duhet të hetojnë se si një armë kimike u përdor në tokën ruse”.
