Prokuroria e Posaçme ka reaguar pas lajmit për masat e reja të sigurisë të vendosura për kreun e SPAK, Altin Dumani.
SPAK nuk e mohon lajmin se Dumani lëviz me makinë të blinduar dhe pranë banesës së tij është shtuar një grup policor, por thekson se mbrojtja është konform procedurave standarde të miratuara.
“Nisur nga publikimet ne media dhe interesi i lartë publik, informojmë se: Në zbatim të akteve ligjore dhe nënligjore Drejtuesi i Prokurorisë së Posaçme mbrohet nga Garda e Republikës e cila bashkëpunon dhe koordinon veprimet me Policinë e Shtetit. Mbrojtja e Drejtuesit të Prokurorisë është konform procedurave standarde të miratuara”, deklaron SPAK.
Kujtojmë se në muajt e fundit, Struktura e Posaçme kundër Korrupsionit dhe Krimit të Organizuar ka ndërmarrë një sërë aksionesh në kuadër të të cilave janë vënë në pranga persona të dyshuar, mes të cilëve edhe zyrtarë apo ish-zyrtarë të shtetit.
