Është vënë në pranga në Greqi një 55 vjeçar shqiptar, i cili ishte dënuar me 5 vite burg për ngacmim seksual ndaj të miturve. Bëhet fjalë për trajnerin e futbollit Sokol Metaj, i cili ka ngacmuar dy të mitur në një kalçeto në Tiranë në 2015-ën, ku njëri prej tyre ishte nxënësi i tij. Ai do të ekstradohet drejt Shqipërisë.
Njoftimi i Policisë
Në vijim të bashkëpunimit të ZQK Interpol Tirana, me zyrat homologe, për kapjen dhe ekstradimin e personave në kërkim ndërkombëtar, si rezulat i shkëmbimit të informacionit është vënë në pranga në Greqi dhe është ekstraduar drejt Shqipërisë, shtetasi shqiptar Sokol Metaj, 55 vjeç, banues në Tiranë.
Shtetasi Sokol Metaj ishte shpallur person në kërkim ndërkombëtar, pasi Gjykata e Shkallës së Parë Tiranë e ka dënuar me 5 vjet burg për veprën penale “Ngacmimi seksual” dhe Gjykata e Apelit Tiranë ka vendosur lënien në fuqi të këtij vendimi penal.
Përmbledhje e ngjarjes së ndodhur:
Më datë 15.11.2015, në afërsi të kalçetove të një kompleksi në Tiranë, në automjetin e tij, i dënuari Sokol Metaj, i cili ishte trajner futbolli, ka ngacmuar seksualisht dy shtetas të mitur, njërin prej të cilëve e kishte nxënës në kursin e tij të futbollit.
