Ndërsa Spanja është e paralizuar nga dëbora dhe qytetarët po përballen me një situatë aspak të zakontë, nga ana tjetër në Greqi ndonëse jemi në mesin e muajit janar po shijohen rrezet e diellit.

Greqia është duke përjetuar temperatura tepër të larta aspak të zakonta për këtë stinë, që pritet të tejkalojnë mesataren për sezonin e dimrit me 15 gradë celsius.

Në kushte të tilla të shumtë kanë qenë ata qytetarë që kanë zgjedhur të shijojnë rrezet e diellit edhe në plazh, duke u ulur mbi rërë apo edhe duke shëtitur.

Shërbimi Kombëtar Meteorologjik (EMY) tha se temperaturat në Athinë do të arrinin 23 gradë Celsius dhe deri 26 gradë në ishullin e Kretës, e gjitha kjo për shkak të masave të nxehta të ajrit dhe pluhurit që mbërrin nga kontinenti Afrikan.

Temperaturat mesatare për janarin në Greqi variojnë nga 0 gradë celsius deri në 5 gradë celsius dhe 10 gradë më së shumti në rajonet bregdetare.

“Moti po na çmend! Sepse ne shohim dëborë, të ftohtë dhe katastrofë në Europë, në Spanjë dhe këtu kemi ditë të këndshme, kemi rrezet e diellit,” – u shpreh një qytetar.

Ndërkohë që një 65-vjeçar pohoi se situata nuk është normale duke qenë se vitin e kaluar ishte ftohtë.

Në 50 vitet e fundit temperatura të tilla të larta për janarin janë regjistruar vetëm dy herë, në 1987 dhe 2010. Në vitet e fundit vendi ka vërejtur fenomene ekstreme të motit, nga valët e nxehtësisë te përmbytjet. Meteorologët shprehen se fronti i ngrohtë, i cili hyri të shtunën, pritet të largohet në ditët e ardhshme.

Por në kushtet e pandemisë edhe policia ishte aty për të patrulluar turmat e njerëzve që u mblodhën në shëtitoren e plazhit. Greqia është nën izolim deri në 18 janar.

Spanja në garë me kohën

Spanja është në alarm dhe në garë me kohën. Autoritetet kanë nisur pastrimin e rrugëve të bllokuara për të furnizuar me ushqime dhe vaksina kundër COVID-19 zonat e bllokuara. Nga ana tjetër parashikohet që temperaturat mund të ulen disa gradë dhe e gjithë dëbora që ka mbuluar rrugët të kthehen në akull duke shkaktuar probleme më të madha.

Në Madrid, që është një nga zonat më të prekura, dëbora ka arritur deri në 50 centimetra dhe temperaturat janë shumë të ulëta. Por sinoptikanët kanë paralajmëruar që temperaturat mund të bien dhe dëbora mund të kthehet në akull që shton rrezikun.