Në radhët e Juventusit askush nuk e ka planifikuar një sezon pa qenë pjesë e Champions League, gjithmonë nëse bardhezinjtë mbeten jashtë saj. Ndaj Fiorentinës, Zonja e Vjetër tregoi që është një skuadër e cila ka limite dhe përgjatë këtij sezoni shpesh e ka treguar se nuk e ka forcën për të shkuar përtej pritshmërive.
Gara për të siguruar një biletë ne Ligën e Kampioneve sa vjen e bëhet edhe më e vështirë dhe forma që po tregojnë bardhezinjtë nuk jep garanci që ata do të jenë një prej ekipeve që do t’ia dalin të sigurojnë pjesëmarrjen.
Sulmi i Juventusit gjithashtu po shfaq probleme të mëdha, mungojnë golat e Ronaldos. Në tre ndeshjet e fundit mungojnë finalizimet e portugezit, ndërsa e ardhmja e bomberit duket se do të jetë larg Juventusit.
Dëmtimi i Federico Chiesas është një faktor penalizues për Juventusin, teksa disa prej golave që ka shënuar Cristiano Ronaldo kanë ardhur pikërisht falë asisteve të dhuruara nga ish-lojtari i Fiorentinës. Zonja e Vjetër tashmë e sheh veten nën presion, e një sezon pa Champions do të konsiderohej një dështim total për një klub që prej 9 vitesh dominon futbollin italian.
