Zbulohen kandidatët e PD-së për Bashkinë e Shkodrës dhe Lushnjës

Strukturat drejtuese të PD në Shkodër kanë propozuar Xhemal Bushatin për kryetar bashkie.

Propozimi do të kalojë për miratim në Kryesinë qendrore në Tiranë.

Sipas afateve të vendosura nga Kryesia e PD, baza e partisë dhe strukturat drejtuese të Degëve në 6 bashkitë, do të propozojnë kandidatët.

Kandidatët e propozuara nga baza do i nënshtrohen më pas shqyrtimit dhe miratimit nga Kryesia e PD.

Një ditë më parë, strukturat e PD propozuan kandidatët për kryetar bashkie edhe në qytetin e Durrësit dhe atë të Rrogozhinës. Në Durrës është propozuar emri i Luan Hotit, ndërsa në Rrogozhinë Ferdinant Saraci.

Pas Xhemal Bushatit në Shkodër, Indrit Sefa është propozuar nga anëtarësia e degës së PD në Lushnjë për të kandiduar për kryetar bashkie në zgjedhjet lokale të 6 marsit.

Indrit Sefa mban edhe postin e sekretarit për çështjet ligjore e zgjedhore në Partinë Demokratike.

Një ditë më parë, edhe PS zyrtarizoi kandidaten e saj për kryetar të kësaj bashkie. Ajo është Eriselda Sefa. Kandidatura e Sefës sipas PS, mori mbështetjen më të madhe nga strukturat dhe pëlqimin më të lartë në sondazhet e kryera. Aktualisht Eriselda Sefa mban detyrën e kryetares së komanduar në këtë  bashki, pas arrestimit të Fatos Tushes.

Kandidati nga Komisioni i Rithemelimit për Bashkinë e Lushnjës do të jetë Elton Bano.