“Kur mbyllet një cikël, lindin shumë ndjesi”. Kështu e nis Sergio Aguero, në Twitter, letrën e lamtumirës për tifozët e Manchester City-t. Drejtuesit, në fakt, kanë vendosur të mos ia rinovojnë kontratën argjentinasit, që i skadon në qershor, siç thuhet me një lajm në faqen zyrtare të klubit.

“Tek unë mbetet një ndjenjë e madhe kënaqësie dhe krenarie që kam luajtur për Manchester City-t për 10 sezone të plota, gjë që është e pazakontë për një lojtar profesionist këto ditë”, – vazhdon “El Kun”. – 10 sezone me rezultate të rëndësishme, gjatë së cilave arrita të bëhesha shënuesi më i mirë i të gjitha kohërave dhe të krijoja një lidhje të pathyeshme me të gjithë ata që e duan këtë klub, njerëz që do të jenë gjithmonë në zemrën time”.

Manchester City do t’i japë një lamtumirë të ngrohtë dhe emocionale sulmuesit legjendar, Sergio Aguero, kur kontrata e tij të skadojë, këtë verë.

Presidenti i Citizens, Khaldoon Al Mubarak, zbuloi se, ashtu si David Silva dhe Vincent Kompany, për Agueron do të ngrihet një statujë. Karriera e tij do të mbahet mend përgjithmonë me instalimin e mozaikëve në Akademinë e Futbollit të City-t. Al Mubarak më tej shtoi: “Kontributi i Sergios te Manchester City gjatë 10 viteve të fundit nuk mund të nënvlerësohet. Legjenda e tij do të mbetet e ngulitur në mënyrë të pashlyeshme në kujtimet e të gjithë atyre që e duan klubin dhe ndoshta edhe të atyre që thjesht e duan futbollin. Nuk është ende koha për fjalë lamtumire dhe fjalime. Ka ende shumë për të bërë deri në fund të sezonit nga Aguero, ne po presim me padurim kontributin e tij në sfidat që kanë mbetur.”