Policia e Shtetit nuk e gjeti në shtëpi Adriatik Llallën. Vetëm pak orë pasi u shpall në kërkim nga SPAK, oficerët shkuan mbrëmjen e sotme në shtëpinë e ish-kryeprokurorit për ta arrestuar, por nuk e gjetën në shtëpi.
Banesa është vendi i parë ku realizohet kërkimi pas firmosjes së urdhër arrestit, por trupa e policisë së Tiranës doli duarbosh, pasi nuk e gjeti në shtëpi. Ai dyshohet se ndodhet jashtë vendit, ndërsa avokati i tij, tha sot se është i shtruar në spital. Avokati Sokol Hazizaj e cilësoi vendimin të pa drejtë dhe për këtë do i drejtohet Gjykatës së Lartë.
Sot Gjykata e Posaçme e Apelit la në fuqi dënimin me 2 vite burg për ish-kryeprokurorin Adriatik Llalla për fshehje të pasurisë. Në seancën e së mërkurës Llalla nuk ishte i pranishëm dhe përveç dënimit me burg, gjykata i konfiskoi 11 mijë metra katror toke dhe një apartament në Durrës si dhe të drejtën që mos ushtrojë për 5 vite funksione publike.
Llalla është ish-zyrtari i parë i lartë i drejtësisë që dënohet me burg. Në vitin 2018 Llalla u shpall “non grata” nga SHBA.
