Paraditen e së dielës së 25 prillit, Kakavija, pika më e madhe e kalimit kufitar mes Shqipërisë dhe Greqisë ishte e zbrazur. Si në asnjë proces tjetër zgjedhor, disa mijëra emigrantë që ktheheshin nga Greqia për votime nuk udhëtuan në Shqipëri.
Tatjana dhe Rexhepi nga Librazhdi që erdhën në Shqipëri për një familjar të sëmurë thanë në kufi se emigrantët shqiptarë nuk mund të udhëtojnë prej situatës së bllokimit të lëvizjes në Greqi nga pandemia. Një tjetër problem madhor tha çifti shqiptar që jetonte në Athinë është vendosja e karantimit 14 ditor nga autoritetet shqiptare të shëndetësisë.
“Ne erdhëm se kemi një familjar të sëmurë rëndë dhe nuk dimë si do veprojmë në kthim pasi të martën duhet të jemi në punë dhe vajzën e vogël e kemi lënë në Athinë tek disa të afërm”, thanë dy bashkëshortët. Zëdhënësja e Policisë së Gjirokastrës Oltiana Nano tha se më datë 24 prill shërbimet kufitare shqiptare në Kakavijë, kanë përballuar një volum normal aktivitetesh në kontroll të udhëtarëve dhe mjeteve, gjatë hyrjes dhe daljes në 24 orët e fundit. Sipas zëdhënëses janë përpunuar gjithsej 963 shtetas në hyrje–dalje, nga të cilët 571 në hyrje, dhe 392 në dalje të territorit shqiptar”. Pika kufitare e Kakavijës është e vetmja që funksionon mes Shqipërisë dhe Greqisë pasi autoritetet greke kanë mbyllur fundvitin e shkuar Pikën e Qafë Botës, në Sarandë dhe të Tri Urave në Përmet si dhe Portin e Sarandës ku vinin udhëtarë nga ishulli grek i Korfuzit.
Moskthimi i emigrantëve nga Greqia ka ulur ndjeshëm pjesëmarrjen në votime sidomos në zonat që banohen nga pakica greke në Gjirokastër dhe në Sarandë por edhe zonat e tjera të prekura nga emigrimi drejt Greqisë fqinje. Në dy bashkitë e Dropullit dhe Finiqit pjesëmarrja e votuesve deri rreth orës 12 të mesditës ishte tejet e ulët, rreth 15%. Në qendrën e votimit në Dervician, një nga fshatrat me më shumë banorë të Bashkisë së Dropullit një anëtar i komisionit të qendrës së votimit tha rreth orës 11.45 se kishin votuar 98 persona nga 844 që kishte gjithsej kjo qendër.
“Në traditën e zgjedhësve është votimi gjatë paradites tha një vëzhgues i pavarur, pasi shumica e votuesve sipas tij janë të moshuar. Komitetit Teknik i pandemisë në Shqipëri vendosi të hënën e 19 prillit, që shtetasit shqiptarë që hyjnë nga Greqia dhe Maqedonia e Veriut duhet të zbatojnë izolimin e detyruar dyjavor.
Drejtori i Departamentit të Kufirit dhe Migracionit Eduart Merkaj tha gjatë një inspektimi në Pikën e Kalimit Kufitar në Kakavijë se “propozimi i dhënë nga Komiteti Teknik, të cilët janë njerëzit përgjegjës që marrin këto vendime, është shoqëruar me urdhrin e Ministrit të Shëndetësisë, me numër 219, dt. 19.04.2021. Pas vendimit të komitetit, Drejtori i Përgjithshëm i Policisë ka dërguar telegram që në bazë të procedurave pikat kufitare të marrin detyrimet e tyre. Është e parashikuar qartë në kontrollin e shtetasve për t’u plotësuar një formular, ndërsa për veprimet është përgjegjësi e tyre për vetëkarantinim”, deklaroi Merkaj.
Lëvizja Socialiste për Integrim, një ditë pas vendimit të Komitetit Teknik të Ekspertëve për vendosjen e karantinës dy javore të shtetasve shqiptarë që vijnë nga Greqia dhe Maqedonia e Veriut iu drejtua me një padi Gjykatës Administrative të Tiranës ku kërkoi pezullimin e vendimit të, marrë më datën 19 prill 2021 . Edhe disa shoqata të emigrantëve shqiptarë në Greqi firmosën një peticion kundër vendimit të Komitetit të Ekspertëve dhe ia dërguan Presidentit të Republikës, i cili, deklaroi se e përcolli shqetësimin tek qeveria, Ministria e Shëndetësisë dhe Komisioni Qendror i Zgjedhjeve. Gjykata Administrative e shkallës së parë shpalli moskopetencë për kërkesën e Lëvizjes Socialiste për Integrim. duke ia kaluar Apelit, i cila vendosi rrëzimin e kërkesës./R.K/Birn
